Le texte de cette page a été corrigé et est conforme au fac-similé.
Trestout outre parmi le bus
Ke del cheval l’abati jus
A tiere ; avoir le cuide mort.
Orghius as fius Ysengrin fort
Se combat, Renart s’i embat
Si que Primaut ariere abat
Et au céoir que Primaut fist,
Renart en traïson l’ocist
Si soutilment ke nus ki vive
Ne s’en prist garde. Se haïne
A cier à Ysengrin vendue,
Navré à mort l’a, et tolue
A à Primaut son fil la vie
En traïson par felounie,
Come encriesmes, fel, desloiaus,
Com cil ki point n’est des loiaus,
Ains est plains de desloiauté
Dont cil sont tous desloiauté
Des loiaus ki Renart soustoistent,
Car par Renart l’autrui couvoitent
A avoir par male raison :
En Renart n’a fors traïson.
Ysengrins jut pasmés à tiere,
Il clot les iols et les dens siere.
