Le texte de cette page a été corrigé et est conforme au fac-similé.
Quant ne puéent venir à cop
Si lancent et fierent d’estoc
De tel force et de tel viertu,
Ke desmaillié et desronpu
Sont lor escu et lor clavain.
Ysengrins fiert Renart à plain
Sour l’iaume qu’il le fist broncier
Adens sour le col dou destrier.
Renars estoit priés del outrer,
Qu’il ne pooit mais contrester
A Ysengrin ne tant ne quant ;
Jus l’éust mis del auferrant
Ysengrins, s’Orghius et se route
Ne fust ki Ysengrin desroute
Et les plusiors ont mis à piet.
En poi d’eure à home mesciet.
Renart quant ce voit, s’esvertue,
Poi se prise s’ore ne tue
Ysengrin ke de mortel gerre
Het : lors a sacié dou fuerre
Une trençant misericorde
U jà n’ara misericorde
Ysengrins, car Renart li lance
Parmi le cors jusques au mance
