Ki od lui armé au moustier
Alerent pour le Dieu mestier
Oïr l’Archepreste Timer :
Couvint la grant messe canter ;
L’offrande fu et biele et rice
Maint frumal d’or et mainte afice
I offri-on à icel jour.
Enpriès messe el palais majour
Monta li Rois et li Princier
Et tout li nouviel chevalier,
Puis lor douna li Rois destriers
Bruns, bais, bauchans, fors et legiers.
Cascuns monte où sien ki ains ains,
Orghius fu montés premerains,
En son puing ot de fauseté
Lance à un fier de cruauté.
En son sa lance ot un pignon
De boisdie. Orghius a haut ton
Cria le quintaine drecier
Face li Rois sans atargier,
Et on si fist en une lande.
Orghius ki riens plus ne demande,
S’esmuet des rens lance sour fautre ;
Apriès lui muevent tout li autre.
A la quintaine ala jouster,
A poi k’il ne le fist vierser.
