Cil fu maistres de son ostel.
Li Thigres apriès n’i ot tel,
Estoit huisiers et chambrelens.
Li Oliphans qui estoit lens,
Fu à la porte pour ovrir
As grans fiestes as Cours tenir.
Li Bugles qui moult estoit fors,
Refu huisiers pour çou que hors
Demourassent cil qui à Court
N’aportent chose qui atourt
A la maisnie charité.
Boutillier furent apresté
Pirolus et Dant Simia ;
Raugiver mesire Talpa
Furent maistre de la cuisine.
Ursus d’autre part le racline
Qu’il fu li maistre panetiers ;
Taurus d’autre part mesagiers
Furent entre lui et Aper.
Que vos diroie ? En nés un ver
Ne truis que ne fust remués
De toutes choses li ostés
Dou Roi Lion et dou Renart.
Quant çou fu fait, si fu moult tart
Ains que les taules fusent mises,
Dont n’i ot fait longes devises,
C’apriès tost que li Rois s’asist,
Apriès li autre nus n’i mist
Page:Le Roman du Renart, 1826, tome 4.djvu/107
Le texte de cette page a été corrigé et est conforme au fac-similé.
