N’i vont plus d’aloigne querant.
Tardif, l’Escofle et Ferrant,
Le Gresillon et le Fourmi
Qui moult estoient bon ami
Et preuz et vaillanz sanz desroi,
Cil garderent de par le Roi
Moult très bien et moult sagement.
Qant fet furent li serement,
Si les ont ensemble lessié,
Lors s’est l’un vers l’autre eslessié,
Et Renart qui premier l’assaut,
Enprès Chantecler fet un saut ;
Granz cos li done de la poe.
Et Chantecler delez la joe
Li fet de son bec une roie
Si grant que li clers sans en roie,
Que jusqu’au talon va la gote,
Et des iex ne vit nule gote
De l’erréure d’une live.
Il pert bien la char avez vive,
Fet Chantecler qui le tint cort,
Que li sans toz vermaus en cort :
Folie vos fist à moi prendre,
Je vos ferai encui aprendre
Conment je me sai maintenir.
Se por outré te veulz tenir,
Je lo que te cleimes vaincu,
Pendre te fai, trop as vescu.
Page:Le Roman du Renart, 1826, tome 3.djvu/381
Le texte de cette page a été corrigé et est conforme au fac-similé.