Page:Le Roman du Renart, 1826, tome 3.djvu/359

Le texte de cette page a été corrigé et est conforme au fac-similé.

Envers Bruiant vint aïrié,
Et cil li a le pié haucié
Tot ainssi con à lui affiert,
29360Et Frobert un grant cop i fiert :
A pou le cuir ne l’en a fret.
De maintenant ariers se tret
Bruiant le Tor tot esbahi,
Et Danz Froberz le pié tendi,
A grant joie et à grant léesce
Isnelement à lui s’adresce,
Qanqu’il onques puet i a point
Baucent li Sangler à cel point,
Et fiert Frobert le Gresillon
29370Si qu’il l’abat agenoillon ;
Mès tost en estant resailli
Et dit, vos n’avez pas failli,
Sire Baucent, ce dit Frobert,
Foi que je doi sire Robert :
Moult durement vos lo et pris
Qant vos tel chevalier de pris
Avez devant moi abatu,
Moult en sui de joie esbatu.
Sire Frobert, ce dit Baucens,
29380Par la foi que doi Saint Laurens
Riens se jeu non n’i entendi,
Lors s’assiet et le pié tendi,
Si a feru sans demorée
Tardiz qui a sa chape ostée.