A jouer et tot erraument
Perdi Renart son garnement.
Ysengrin qui ot gaaignié
En ot le cuer joiant et lié.
Tantost sans plus de demorer
A fait un grant clo aporter,
Parmi la c… li ficha
Et à l’eschequier l’atacha,
Puis s’en torna et si le let.
Renart remaint qui crie et bret
Toz correciez et toz plainz d’ire,
Que il soffroit si grant martire.
Ma Dame Fiere oï le cri,
Maintenant cele part guenchi.
Qant vit Renart, si fu marrie,
Cele part vient, si li aïe ;
A grant paine d’iluec l’estort.
Dedenz sa chambre le repost
Et le coucha dedenz son lit,
Mès il n’i ot point de delit,
Que de doulor ert si destroit
A pou le cuer ne li partoit.
Del corroz qu’il ot sanmella,
Malades fu, si se pasma.
En pamoisons jut longuement,
Qu’ele cuidoit veraiement
Que il fust mort, si s’escria :
Sire Renart, ce que sera,
Page:Le Roman du Renart, 1826, tome 3.djvu/345
Le texte de cette page a été corrigé et est conforme au fac-similé.
