Et Coarz son Peletier porte.
Ne finerent jusqu’à la porte
Mon seignor Noble le Lion,
Endui i vienent li baron
Sanz deffenz et sanz contredit.
Coarz si a à Renart dit :
Renart, dist-il, biax douz amis,
Le Vilain que je port m’a mis
En grant travail, en grant ahan,
Et Dex le mete hui en malan
Qui en avant le portera !
Ore orrons que li Rois dira
Et li baron du jugement,
A quel paine et à quel torment
Nos ferons ce Vilain morir.
Et dit Renart, moult le desir
Que vos soiez de lui vengié.
Maintenant montent le planchié
Li dui baron sanz nul delai,
En la sale truevent le Roi,
Et ot entor lui mainte beste.
Cel jor celebroit une feste
D’une haute Dame honorée,
La suer Pinte, Dame Coupée
Qui fu ocise en traïson.
Le jor en fesoit mencion
Li Rois Nobles et son barné,
Que iluec erent assemblé.
Page:Le Roman du Renart, 1826, tome 3.djvu/339
Le texte de cette page a été corrigé et est conforme au fac-similé.
