Percehaie l’a si feru
Que il li a percié l’escu,
Ou li pesast, ou bel li fust
Que de la lance et fer et fust
Ne li passast parmi li foie ;
Mort le trebuche enmi la voie ;
Puis sacha del fuerre l’espée,
A Ferant done tel colée
Que li fist la teste voler :
De dis fist la guerre finer.
Renart s’eslesse d’autre part,
Grant cop vet ferir le Liépart
De son glaive parmi le cors,
Que li fers en parut defors ;
Tant con la lance li dura,
A la terre le trébucha.
Moult i ot grant chaple et felon :
Estes-voz Noble le Lion
Armé sor son cheval ferrant,
La lance en son poing paumoiant :
O li ot maint Duc et maint Conte,
Tant en i ot n’en sai le conte.
O li fu li Conte Frobert
Et l’Escoufle sire Hubert
Qui héent Renart durement ;
Vers lui vienent iréement.
Sire Frobert le Gresillon
Plus tost que un alerion
Page:Le Roman du Renart, 1826, tome 3.djvu/294
Le texte de cette page a été corrigé et est conforme au fac-similé.
