Ahi ! lasse, que porrai faire ?
Lasse ! con ci a mal afaire
S’ainsi avons perdu Rovel !
Miex vousisse que cest chastel
Fust mis en charbon et en cendre.
Faites voz deus prisoniers prendre
Et si mandez à ceus del ost
Se ne vos rendent Rovel tost,
Que vos ferez pendre Brun l’Ors
Et Bruiant, n’en auront secors.
Dame, fet-il, bien avez dit,
Je méismes sanz contredit
Irai desus le mur crier.
Lors vait sus le mur apoier,
Et s’escria que bien l’ot-on :
Entent çà, Noble le Lion ;
Tu tiens en prison mon enfant,
Et je r’ai Brun l’Ors et Bruiant :
Or fai lequel que tu vodras,
Ou tu Rovel mon filz rendras,
Ou tu verras Brun sanz demor
Pendre là amont sus ma tor,
Et si sera pendu Bruiant.
Li Rois respont, ce est noiant,
Que jamais nul jor nel’ verras,
Or i parra que tu feras.
Atant est Renart descendu,
A pou qu’il n’a le sens perdu ;
Page:Le Roman du Renart, 1826, tome 3.djvu/286
Le texte de cette page a été corrigé et est conforme au fac-similé.
