Des mès, mès ne les contai pas.
Qant mengié ont plus que le pas,
Se lievent tuit premierement,
Tybert et Grinbert solement,
Qui moult furent bon conpaingnon,
Cil dui font la benéiçon
Desus les lis as deus amanz,
Puis s’en partent liez et joianz,
Et cil remestrent totevoie.
Lor déduit firent à grant joie
Jusqu’au matin qu’il ajorna.
Mi sire Renart se leva
A grant joie et à grant baudor :
Tot meintenant et sanz demor
A fet le tresor esfondrer
Que là ne volt plus demorer.
Les deniers et l’or et l’argent
En a fet doner à sa gent,
Par convent qu’il n’i entra puis :
Porter en fait à Malpertuis
Que il se dote, si a droit,
Del Roi qui arier revenoit.
Contre lui se vodra tenir,
Por ce fet son chastel garnir
D’arméures et de vitaille,
Ne cuit devant set ans li faille.
Li chastiax est si bien asis
Jà ne sera par force pris,
Page:Le Roman du Renart, 1826, tome 3.djvu/266
Le texte de cette page a été corrigé et est conforme au fac-similé.
