Sel’ vos amenrai se ge puis.
Dist Morhout, se tenir le puis,
Ge ne demant nule autre chose.
Droïn s’en vet, cil se repose ;
Si s’en vole par un essart
Droitement au recet Renart,
Car il le savoit moult très bien.
Droïn qui nel’ dote de rien,
S’en est venu devant son huis,
Si regarde par un pertuis
Et voit Renart qui se gisoit.
Et cil qui moult de mal savoit,
S’escrie quanqu’il pot crier :
Renart, car me venés mangier,
Vien tost à moi et si m’estrangle,
Ge ne me movrai de cest angle,
Ne me voil d’ici desrengier :
Tel dol ai je cuit enragier.
Vien, s’en delivre le païs,
Qant tu as mes enfanz ocis,
Car certes ne quier vivre mès.
Renart se gisoit tot en pès ;
Moult aése se reposoit
Qant oï Droïn qui crioit
Que il l’alast mangier là fors.
Trestot maintenant sailli hors,
Où qu’il voit Droïn, si li cort,
Mès n’ot cure de tel acort,
Page:Le Roman du Renart, 1826, tome 3.djvu/223
Le texte de cette page a été corrigé et est conforme au fac-similé.
