Mais sachoiz por un marc d’or fin
Ne retornast vers Ysengrin.
Fuiant s’en vet tot corociez
Que durement estoit bleciez.
Et qant Renart voit qu’il s’en vet,
Un petitet en sus se tret
Qu’il ne velt qu’Ysengrin le voie.
Tantost se r’est mis à la voie
Qui moult estoit et bele et grant :
Mi sire Renart vet chantant
Une chançon tote novele
D’amoretes qui moult iert bele
Et bien fete, par Saint Firmin,
Chantant s’en vet tot le chemin.
Un chapelet vest en sa teste,
Moult moine grant joie et grant feste
Et fait sanblant que riens ne sache
D’Ysengrin ne de son domage.
Quant Ysengrin le voit venant,
Si li escrie meintenant :
Renart, Renart, baux doz amis,
A poi que n’ai esté maumis ;
Je me sui ci trové liez
D’une hart très parmi les piez
A cest chesne qui est branchu,
Et un vilain qui m’a batu
D’un baston moult granz cous el dos,
Que trestoz en ai mos les os.
Page:Le Roman du Renart, 1826, tome 3.djvu/184
Le texte de cette page a été corrigé et est conforme au fac-similé.
