Chascuns tenoit mace ou baston,
Si s’en vienent droit au penchon.
Et quant Renart les a véu,
N’i a as granment atendu,
Ainz s’en foï sanz demorer
Quanque piez l’en porent porter,
Que grant poor a de sa pel.
Et cil vienent à Roonel,
Le premier hauce le baston,
Roonel fiert sor le crepon
Tel cop qu’à poi ne l’a tué.
Li autre a son baston levé,
Sel’ quide ferir, mais il faut
Que Roonel a fait un saut
Con il vit le baston venir.
Li cop descent de grant aïr,
Que il l’avoit de force enpeint,
S’a si son conpaignon ateint
Que del grant cop qu’il a geté
A poi ne l’a escervelé.
Cil qui ot le cop recéu,
Chiet à terre tot estendu
Tot autresi con s’il fust mort.
Or est Roonel à mal port
Arivez, de voir le sachiez.
Un des autres s’est avanciez
Qui estoit son germain cosin,
Et fiert Roonel le mastin
Page:Le Roman du Renart, 1826, tome 3.djvu/138
Le texte de cette page a été corrigé et est conforme au fac-similé.
