Fuiant s’en vet, ne set que fere,
Or li covient eschace fere,
Autrement ne porroit aler.
Et Renart prist à devaler
À tot sa nef moult durement,
De ce qu’ot fet ne se repent,
Aval l’eve s’en vet abrive.
Atant esgarde vers la rive
Et vit un Vilein qui l’aseine,
Si li a dit : amis, rameine
Cele nef, se vendre la veus,
Je l’achaterai par mes eus.
Par foi, fet Renart, volentiers
La vos vendrai, biax amis chiers :
Foi que doi Seint Pere l’Apostre,
Por quatre chapons sera vostre,
Jà certes por meinz ne l’auroiz.
Dit le Vilein, vos les auroiz,
Je n’en ferai mie lonc plet.
Tantost à sa meson s’en vet,
Quatre chapons prent meintenant,
Puis revint arere corant,
Si les a à Renart bailliez,
Et il les a moult soufachiez,
Et si estoient bon, ce cuit.
Au Vilein a dit, je vos cuit
La nef, bien l’en poez mener
Que je m’en vois sanz demorer
Page:Le Roman du Renart, 1826, tome 3.djvu/132
Le texte de cette page a été corrigé et est conforme au fac-similé.
