Et vos deus freres autresi
Qui le matinet seront ci,
Ensi le vos mandent par nos.
Il dist, bien viengnant soiez-vos,
Fet li Chevalier en riant !
De la table salli errant,
Il les connoist, si les acole
Conme prodom de sa parole,
Que moult liez et joianz en fu.
Atant sont deus valez venu
Moult bel enfant sanz nule faille ;
Li uns aporte une toaille
Et li autres prist deus bacins
Qui toz sont d’argent bons et fins.
Si empli l’un de la fonteine
Qui moult estoit et clere et seine ;
De l’eve done as escuiers
Et il la pristrent volentiers.
Con il orent andui lavé,
Un des valez ont apelé
Et li dient tot sanz tençon,
Alez querre la venoison
Qui est as piez de ces degrez,
Et de nos deus chevax pensez
Que il aient fein et aveine.
Li vallez s’en torne, si meine
Avec li un autre vallet ;
De la venoison s’entremet
Page:Le Roman du Renart, 1826, tome 3.djvu/104
Le texte de cette page a été corrigé et est conforme au fac-similé.
