Et le mal que vos avez fet ;
Se Diex vos giete de cest plet
Gardez-vos bien del renchaoir.
Jà Diex ne me dont tant véoir,
Ce dist Renart, que je mès face
Nule chose qu’à Diex desplace.
Il li otroie quanqu’il volt,
Il s’abaissa et cil l’asolt
Moitié romanz, moitié latin.
Renart, qant ce vint au matin,
Besa sa fame et ses enfanz,
Au departir fu li dels granz ;
Congié prist à son manage,
Enfanz, dist-il, de haut parage,
Pensez de mes chastiax tenir,
Que que de moi doie avenir,
Contre Contes et contre Rois,
Que vos ne troverez des mois
Conte, Prince ne Chasteleine
Qui vos forface un fil de leine :
Jà par eus ne serez grevez
Se vos avez les ponz lever,
Que vos avez asez vitaille,
Ne cuit devant set anz vos faille.
Que vos iroie-je disant ?
A Dame Deu toz vos conmant
Qui me ramaint si con je voil.
Atant mist le pié sor le soil :
Page:Le Roman du Renart, 1826, tome 2.djvu/56
Le texte de cette page a été corrigé et est conforme au fac-similé.