Qant l’Ors ot des vilains la rage,
Fremist et pense en son corage
Que miex li vient le musel perdre
Que Lanfroi le péust aerdre,
Qui devant vint à une hache.
Taste et retaste et tire et sache,
Estent les piaus, rompent les vaines :
Tant a sachié que à grant paines
Fent li cuirs et la teste qasse,
Mès del sanc i lessa grant masse,
La piau des piez et de la teste :
Onc nus ne vit si lede beste.
Le sans li coule del musel,
Entor son vis n’a tant de pel
Dont l’en péust fere une borse.
Einssi s’en va le filz à l’Orse,
Parmi le bois s’en vet fuiant,
Et li vilain le vont huiant :
Goubert le filz sire Gillain,
Et Hardouin cope-vilain,
Et Fainber et le filz Galon,
Dant Helyes le niez Faucon
Et Outrant li cous de la Glée[1]
Qui sa fame avoit estranglée ;
Tigiers li Forniers de la vile
Qui ot un enfant de Poufile[2],
Page:Le Roman du Renart, 1826, tome 2.djvu/39
Le texte de cette page a été corrigé et est conforme au fac-similé.