Ton pooir fai sanz menacier,
Jà ne m’en verras enbronchier,
Ne prier por pès ne por trives,
Ne pris pas deus foilles de cives
Ton menacier ne ton vanter.
Sui-ge chaz à espoanter ?
J’ai mainte tel menace oïe,
Jà par moi n’ert mains esjoïe
Ma mesnie por ceste chose,
Ne nostre porte plus tost close.
Je sui cil qui poi crien et dote
Ton pooir et ta force tote
Que tu ne penses ne ne cuides,
Bien voil tien en soit li estuides
A moi nuire n’à moi grever,
Jà ne me fera main lever
La poor que je ai de toi.
Poi de tex manecéors voi
Qui à pou d’effroier riens valent ;
Maint home sont qui autre assalent
Par parole moult aigrement,
Et si n’ont point de hardement :
Par parole sont moult hardi,
Mès tost restent acouardi
Qant vienent à un poi d’effort.
Tu es moult egres, si es fort
Par menaces, mès petit vaut
Tes povoirs à un poi d’asaut :
Page:Le Roman du Renart, 1826, tome 2.djvu/274
Le texte de cette page a été corrigé et est conforme au fac-similé.
