Se mès vos croi, le maufé m’arde !
Ce dist Renart, trop ies coarde,
Ce fis-ge por toi esmaier,
Einsi te voloie essaier :
Qar certes je n’i entent mie
Ne traïson ne felonie.
Mès or revenez autre foiz,
Tierce foiée, c’est li droiz,
Par non de sainte charité,
Par bien et par estaubleté,
Bele comere, sus levez,
Par cele foi que me devez
Et que devez à mon filluel
Que j’oi chanter sor cel tilluel,
Si refaisomes ceste acorde,
De pechéor misericorde.
Cuidiez-vos donc que je vos morde ?
Or a Renart auques la borde,
Mès cele fet oroille sorde
Qui n’est mie fole ne lorde,
Ainz siet sor la branche du chesne.
Que que Renart si se deresne,
Atant es-vos les venéors,
Et bons levriers et coréors
Qui sor lui se sont enbatu.
Et qant Renart a ce véu,
Forment s’en est esmerveilliez,
De fouir s’est apareilliez.
Page:Le Roman du Renart, 1826, tome 1.djvu/98
Cette page a été validée par deux contributeurs.
