Hordez estoit d’aubes espines.
Dedens avoit mis ses gelines
Dant Costant por la forteresce,
Et Renart cele part s’adresce :
Tout coiement, le col bessié
S’en va tot droit vers le plessié.
Moult fu Renart en grant porchaz,
Mès la force des espinaz
Li destorbe de son afere
Si qu’il n’en set à quel chief trere ;
Ne por luitier ne por saillir
As gelines ne puet venir.
Acroupiz s’est enmi la voie,
Moult se doute que l’en nel’ voie.
Porpense soi que se il saut
As gelines et il i faut,
Il ert véuz, et les gelines
Se repondront soz les espines,
Si porroit estre tost sorpris
Ainz qu’il éust gueres conquis.
Moult par estoit en grant effroi,
Des gelines velt trere o soi
Qui devant lui vont pasturant,
Et Renart va le col baissant :
El retor del paliz choisist
Un pel froissié, dedenz se mist ;
Là où li palis fu desclos
Avoit li vilain planté chos.
Page:Le Roman du Renart, 1826, tome 1.djvu/79
Cette page a été validée par deux contributeurs.
