Cette page a été validée par deux contributeurs.
Si coume Renart fist peschier à Ysengrin les anguiles.
Ce fu un poi devant Noël
Que l’en metoit bacons en sel,
Li ciex fu cler et estelez,
Et li vivier se fu gelez
Où Ysengrin devoit peschier,
Qu’en pooit par desus treschier,
Fors tant c’un pertuis i avoit
Qui des vilains faiz i estoit,
Où il menoient lor atoivre
Chascune nuit juer et boivre :
Un séel i orent lessiez.
Là vint Renart toz eslessiez,
Et son compere regarda,
Sire, fet-il, traiez-vos çà :
Si est là planté de poissons
Et li engin où nos peschons
Les anguilles et les barbiaus
Et autres poissons bons et biaus.
Dist Ysengrin, sire Renart,
Or le prenez de l’une part,
Sel’ me laciez bien à la qeue.
Renart le prent et si li neue
Entor la qeue au miex qu’il puet :
Frere, fet-il, or vos estuet
