Cette page a été validée par deux contributeurs.
Que autresi l’a li Covenz.
Dist Ysengrin, je cuit que menz.
Non faz, sire, ne vos anuit,
Mès iceste première nuit
Vos covient-il metre en esprove,
Que la sainte Ordre le vos rove.
Dist Ysengrin moult bonement,
Ferè ce que à l’Ordre apent,
Jà mar en serez en doutance.
Renart en a pris la fiance
Que par lui mal ne lor vendra,
Et à son los se maintendra.
Tant a fet et tant a ovré
Renart, que bien l’a asoté,
Et vint à Ysengrin tot droit
Qui durement se conplaingnoit
De ce qu’il estoit si près rès
Que cuir ne poil n’i est remès.
N’i ot plus dit ne sejorné,
Andui se sont d’ilec torné
Renart devant et il après,
Tant qu’il vindrent d’un vivier près.
