Qu’il puisse dire, n’enterra,
Et que volez ? si souferra,
Et neporqant il li demande
Un seul morsel de sa viande,
Car m’en donez un sol tronçon,
Nel’ di se por essaier non,
Mès bon fussent-eles peschies
Les anguilles et escorchies,
Se vos en daingniez mengier.
Renart qui bien sot losengier,
Prist d’une anguille deus tronçons
Qui rostissent sor les charbons.
Tant fu cuite que toute esmie,
Et dessoivre toute la mie.
L’un en manja, l’autre en aporte
A celui qui est à la porte :
Lors dist, compere, ça venez
Un poi avant, et si tenez
Par charité de la pitance
A ceux qui bien sont à fiance
Que vos serez moines encore.
Dist Ysengrin, je ne sai ore
Qu’il me sera, bien porra estre ;
Mès la pitance, biau doz mestre,
Car me bailliez isnelement.
Renart li baille, et il la prent
Qui moult tost s’en fu delivrez,
Encor en menjast-il assez.
Page:Le Roman du Renart, 1826, tome 1.djvu/69
Cette page a été validée par deux contributeurs.
