Page:Le Roman du Renart, 1826, tome 1.djvu/360

Le texte de cette page a été corrigé et est conforme au fac-similé.

Que tote sa droiture aura
De qanque demander saura ;
Mès il li covendroit trover,
Se il la chose velt prover,
Soi tierz por amender son droit
A jor nomé ci orendroit,
Puis féismes par droit ester
8890Qu’il ne pooit riens conquester,
Ne droiz n’estoit qu’il conquisist
Por riens que sa fame déist.
Brun et Baucent en desputerent,
Mès cil qui avec nos là erent,
Se tindrent miex à ma partie ;
Mès la chose est si bien partie
Que chascun aura sa droiture.
Puis gardomes en quel mesure
Et qant en sera la loi dite
8900Que Isengrin claint Renart quite.
C’iert diemenche par matin
Devant Roonel le mastin ;
Là manderé Renart qu’il viengne
Et qu’en tel guise se contiengne
Qu’il face sa pès de par Dé
Si con nos l’avons devisé.
Li Lions respont en riant,
Jà par les sainz de Belléant
Ne fusse si liez por mil livres
8910Con de ce que j’en sui delivres :