Renart greva qanque il pot,
Car à la vile aler ne sot,
Dont se porpensa li déables
Que g’iere grant et bien véables,
Et il ert petiz et menuz,
Si i seroie ainz retenuz
Ou fust à bois où fust à plain,
Plus tost méist-on à moi main
Où que nos fusomes nos dui
L’en tendroit ainz à moi q’à li,
Et ge miex i fusse atrapez
Et il plus tost fust eschapez.
Il savoit bien que je aim miel
Plus que chose qui soit soz ciel,
A moi vint où estoie oen
Devant la feste Saint Johen :
Ahi ! dist-il, biau sire Brun
Quel vessel de miel je sai un !
Et où est ? Chiés Costant Desnoes.
Porroie i ge metre les poes ?
Oïl, je l’ai tout espié,
Li blé estoient espié,
Le postis trovames ouvert,
S’entrames enz par l’uis ouvert ;
Lés une granche en un vergier
Là nos déumes herbergier
Et gesir trestot en repos
De si au vespre entre les chos.
Page:Le Roman du Renart, 1826, tome 1.djvu/350
Le texte de cette page a été corrigé et est conforme au fac-similé.
