Jut-il à force, que jel’ vi,
Par la foi que je vos plevi.
Li Lions par sa grant franchise
Ne vost soufrir en nule guise
Que fust en sa cort mal-menez
Qui d’amors fust achoisonez,
Por rien les gages n’en préist,
S’il poïst en pais les méist.
De Renart doute la querele
Dont maistres Ysengrin l’apele,
Si li a dit, se Diex me voie,
Por nule rien ne sofferoie
Qu’entre vos et Renart le court
Vos combatissiez en ma court,
Ne que éussiez guerre ensemble.
Sire, dist Ysengrin, moi semble
Que vos soutenez sa partie,
Mès foi que doi Sainte Marie,
Moult miex me déussiez aidier
Et ma partie consilier,
Que je vos ai toz jours bien fait
Assez miex que Renart n’a fait.
Mais se j’éusse esté boisseres,
Faus et traïtes et tricherres,
Miex m’amissiez : par mon musel
Mau dehait ait cui il est bel,
Que je si bien servi vos ai
Qant si mauvais loier en ai ;
Page:Le Roman du Renart, 1826, tome 1.djvu/342
Le texte de cette page a été corrigé et est conforme au fac-similé.
