Qui vos estes ici clamée
Que Dant Renart vos a amée,
Et vos, amastes-le vos onques ?
Je non, sire. Or me dites donques
Por qoi estiez donc si fole
Qu’en sa meson aliez sole
Dès que vos n’estiez s’amie ?
Merci, sire, ce n’i a mie,
Se vos plet, miex dire poez
Selonc le claim que vos oez
Que vos a dit li conoistable
Mes sires qui bien est estables,
Que il ensemble o moi là vint
Où ceste vergoingne m’avint.
Ert-il o vos ? Ouïl sanz faille,
Qui cuidast ce que Diex i vaille,
Que il esforcier vos déust
Là où li vostres maris fust ?
Lors s’en est Ysengrin levez,
Sire, fet-il, vos ne devez,
Se vos plet, moi ne lui deffendre,
Ainz devez plainement entendre
A la clamor, que que nus die,
Tant ç’on l’ament ou escondie.
Que je vos di bien à fiance
Que j’en voel avoir la venjance,
Que se Renart ert ci presenz,
Je mosterroie qu’à Hersenz
Page:Le Roman du Renart, 1826, tome 1.djvu/341
Le texte de cette page a été corrigé et est conforme au fac-similé.
