Sor l’erbe jetent le bacon,
S’en parolent li compaingnon
Conment il soit partiz à droit.
Li Ors qui plus sages estoit,
Lor dist qu’il n’i est arestez :
Seignor, se mon conseil créez,
En huimès le leron pendant
A cest fou qui est bel et grant,
Et le matin ci revendron,
Trestuit trois nos cus mosterron,
Et cil qui graingnor cul aura,
Le bacon tout en portera.
Ce dist li Leus, et je l’otroi ;
Et je, dist li vilains, par foi.
Le bacon ont en haut levé,
Et puis s’en sont tuit troi allé.
Li vilain vint en sa meson
Où l’atendent si enfançon :
Où estes-vos, dist-il, dame Ame ?
Je sui ci, sire, dist sa fame,
Por quoi avez tant demoré ?
Suer, dist-il, que je ai trové
Un bon bacon enz en cel bos,
Ainz de mes eulz ne vi si gros,
Mès nos somes troi conpaingnon ;
Sez conment nos le partiron ?
Le matin iron là tuit troi,
Si mosterron nos cus tuit troi :
Page:Le Roman du Renart, 1826, tome 1.djvu/292
Le texte de cette page a été corrigé et est conforme au fac-similé.
