Si en aurez en moie foi
Se vos volez venir o moi.
Dist Primaut, la vostre merci :
Or vos levez donques de ci,
Certes car rien tant ne desir
Conme je i puisse venir :
A cest ostel, si con je pens,
Je n’i cuit jà venir à tens,
Ne que j’aie ma pance emplie.
Si ferez par Sainte Marie,
Fet Renart, se me volez croire :
Or venez après moi grant erre.
Renart maintenant si se leve,
Et sachiez que pas ne li grieve
De Primaut que si tost deçoit,[1]
Et li chaitis ne s’aperçoit,
Ançois le sieut grant aléure.
Vers la meson vont l’ambléure,
Bien ont le droit chemin tenu
Tant q’à la meson sont venu.
Renart qui savoit tous les estres,
Regarde par unes fenestres
Si eles estoient fremées,
Mès il les voit toutes barrées,
Et li huis devant clos estoient,
Et cil de laiens se dormoient
- ↑ Al. De Primaut qui si est destroit.
