Cette page a été validée par deux contributeurs.
Si conme Renart et Primaut vendirent
les vestemens au Prestre por un Oyson.
Entre Renart et dant Primaut
Jurent ensemble en un gaut
Jusqu’à tant que l’aube creva
Et que le souleil haut leva.
Lors se sont andui esveillié,
Si ont moult bien apareillié
Conme marchéanz lor fardel,
Et Primaut a pris un hardel,
Et si l’a à son col pendu.
Andui s’en vont col estendu
A la foire, si font grant joie.
Si conme il vindrent enmi la voie,
Si voient venir un Provoire
Qui estoit méuz à la foire
Por achater un vestement ;
Mès il devoit privéement
Chiés un son conpaignon aler
Et avec lui devoit mengier
Privéement en sa meson,
Si fesoit porter un oison.
Renart l’avait apercéu,
Conpains, fet-il, bien est chaü,
