de Limoges, tous Notaires Apostoliques, & Messire Roger Polin, du Diocese de Bayeux, Notaire Imperial ; &, d’autant qu’ils n’entendoient la langue Bretonne, ils firent pour truchemens & interpretes Venerable Auffray, Abbé de Bon-repos, de l’Ordre de Cisteaux, Diocese de Cornouaille, messire Hervé de Pluzunet, Chanoine de Saint Brieuc & de Vennes, Olivier de la Cour, Clerc, & Messire Jacques, Recteur de Meskel, Diocese de Vennes[1], tous Notaires Apostoliques.
XXXVI. L’an suivant, 1331, le 4. jour de Juin, l’Evesque de Limoges presenta, en plein consistoire, l’Enqueste, & Sa Sainteté députa trois Cardinaux pour l’examiner, sçavoir est : Jean, Evesque Portunense[2], Suffragant du Pontife Romain, Jacques, Prestre, Cardinal de Sainte Prisce, & Luc, Diacre de Sainte Marie in via lata, lesquels, l’onzième du mesme mois, ayant pris le serment desdits Commissaires sur la verité de leur susdite enqueste, l’examen fait, reduisirent toute la substance d’icelle en procez-verbal, selon lequel, ils firent leur rapport au saint Consistoire ; mais, sur ces entrefaites, mourut le Pape Jean XXII, auquel succeda Clément VI, lequel celebra fort solemnellement la Canonization de saint Yves, qu’il avoit procurée (n’estant encore que Cardinal) envers les Papes Clement V, Benoist XI & Jean XXII, auquel ayant succedé au Souveraint Pontificat, un jour comme il alloit par pays, saint Yves lui apparut un baston en main, & l’exhorta de se haster à le Canonizer ; Le saint Pere le fit en grande solemnité, le 19. jour de May 1347. Voicy la teneur de l’Arrest de sa Canonization:
XXXVII. A l’honneur du Tout-Puissant, DIEU, PERE, FILS & S. Esprit, pour l’exaltation de la Foy & augmentation de l’Eglise Catholique ; de l’authorité dudit Seigneur Dieu, Pere, Fils & Saint Esprit & des Bien-heureux Apostres Pierre & Paul & de la nostre, & du commun avis de nos Frères, Decretons & diffinissons que le Sr. Yves Helouri[3], de bonne memoire, par cy-devant Prestre du Diocese de Treguer, doit estre écrit au Catalogue des Saints & doit estre de tous honoré comme Saint, &, de fait, l’écrivons au Catalogue des dits Saints ; Statuons & Ordonnons que tous les ans, au 19. de May, qui est le jour de son decés, sa Feste soit celebrée par l’Eglie Universelie devotement et solemnellement, & luy soit fait Office, comme d’un Confesseur non Pontife. Au surplus, de la mesme authorité, concédons à tous ceux qui, Penitens & Confessez, au jour de l’Elevation de son Corps ou le jour qu’on celebrera la premiere Feste en son honneur, visiteront l’Eglise de Treguer, sept ans & sept quarantaines d’indulgences ; &, devant les Octaves desdites Elevation & solemnité premiere, chacun un an & une quarantaine ; & à ceux qui visiteront le Sepulchre dudit Saint, chacun an, au jour de sa Nativité, ou de sa Mort où de l’Elevation de son S. Corps un an & une quarantaine ; & à ceux qui le feront aux jours estans dans l’Octave desdites festes cent jours de pardon & Indulgences des Penitences à eux enjointes.
Avant que proceder à sa Canonization, le Pape fit un beau Sermon, qu’il ne sera pas hors de propos de mettre icy comme en son propre lieu.
- ↑ Mesquer est pres de Guérande au diocese de Nantes.
- ↑ Albert veut dire Evêque de Porto, l’un des sieges suburbicaires occupes par les cardinaux de l’ordre des évêques. — A.-M. T,
- ↑ Nota que le surnom de S. Yves n’estoit pas Helori mais de Kermartin, toutesfois il se trouve avoir signe Yvo Hælori de Ker-martin, se servant de Helouri qui estoit le nom propre de son pere, comme de nom patronimique, non pas comme de surnom disant Yvo Hælorii, comme qui diroit Yvo Filius Helorii, — A.
