Page:Le Grand Albert - La Vie des Saints.djvu/210

Le texte de cette page a été corrigé et est conforme au fac-similé.

que l’on avoit coupez, de sorte que, si on en avoit coupé vingt, il s’en trouvoit soixante. Le Seigneur de Rostrenen, ayant veu ce miracle, se jetta aux pieds de saint Yves, &, luy ayant demandé pardon, luy permit d’en prendre tout autant qu’il auroit aftaire. Un autre miracle non moindre arriva à l’endroit du maistre Charpentier, qui avoit entrepris la structure de la Cathedrale de Treguer, il avoit coupé toutes ses poutres & autres pieces trop courtes de deux pieds ; cela le mit au desespoir & se vouloit pendre ; en cette destresse, il alla trouver saint Yves, &, en sa presence & d’une multitude de peuple, mesura son bois une & deux fois & le trouva tel qu’il avoit dit : saint Yves le consola, &, s’estant un peu abaissé, pria Dieu pour luy, puis luy dist : « Mon amy, prenez vostre ligne, mesurez encore une fois, vous vous estes peut-estre trompé : » il obeït au Saint & trouva toutes ses pieces plus longues de deux grands pieds qu’il ne falloit.

XXIV. Enfin, saint Yves tout cassé & usé, plus de travaux & austeritez que de vieillesse, tombas malade apres Pasques ; &, connoissant que Dieu vouloit mettre fin à ses travaux & donner commencement à son repos, il se disposa à ce passage, quoy que toute sa vie n’eust est qu’une continuelle preparation à la mort. Le Mercredy, quinzième de May, Vigile de l’Ascension, il se sentit si foible & debile, qu’à peine se pouvoit-il tenir sur pieds ; il celebra la Messe en sa Chappelle de Ker-Martin, l’Abbé de Beauport le soustenant d’un costé, & Messire Alain, Archidiacre de Treguer, de l’autre. La Messe estant finie, il entendit de confession ceux qui se presenterent, puis se coucha sur sa claye ordinaire. Les nouvelles de sa maladie divulguées, plusieurs personnes de qualité le visiterent, tant Ecclesiastiques que Laïcs : entr’autres, s’y rendirent l’Official, (qui lui avoit succedé en cét Office) & un Recteur, nommé Jean, lesquels, le voyant si durement couché sur sa claye, en ses accoustremens ordinaires, le reprindrent de cette trop grande austerité, disant, qu’à tout le moins il devoit avoir davantage de paille sous soy ; mais il leur repondit doucement « qu’il estoit bien ainsi, & qu’il n’en meritoit pas d’avantage. »

XXV. Le lendemain, Jeudy, seizième de May, jour de l’Ascension, il se confessa & se fit revétir de ses habits Sacerdotaux ; &, voyant sa Chappelle pleine de peuple, qui de toutes parts le venoit visiter, il leur fit une belle exhortation, laquelle leur tiroit les larmes des yeux ; &, voyant qu’un grand nombre de ses Paroissiens de Lohanech le venoit voit, il y envoya Jacques, son serviteur, pour les remercier de sa part & leur dire qu’il estoit en bon estat, graces à Dieu. Le Vendredy, dix-septième May, un Prestre, nommé Messire Derien, luy ayant dit, entr’autres propos, qu’il devoit faire venir le Médecin, le Saint, levant les yeux & les bras vers un Crucifix qu’il avoit devant soy, lui dist qu’il n’avoit affaire d’autre Médecin que de celuy-là. Le Samedy, dix-huitiesme jour de May, il fut mis en Extrême-Onction, presens le Grand Vicaire & Official de Treguer, Messire Geffroy et Alain Prestres ; le Prestre qui l’oignoit s’appelloit Messire Hamon, auquel il répondoit & aidoit, ayant la veuë portée sur le Crucifix. Aprés, il s’affoiblit fort & perdit la parole ; &, ayant passé le reste de ce jour & toute la nuit suivante en veilles, prieres & contemplations, le lendemain, Dimanche aprés l’Ascension, dix-neufième de May, au Crepuscule, cette sainte Ame s’envola au Ciel, où elle joüit de celuy, à qui elle avoit si fidellement servy en ce monde. Il deceda le cinquantième an de son âge, cinq mois moins, & de Nostre Seigneur l’an 1303, le dix-huitième du regne de Jean II. du nom, Duc de Bretagne.

XXVI. Le jour mesme, le Corps fur porté, de la Chappelle de Ker-Martin où il estoit, dans la grande Eglise de Treguer, où se rendit une innombrable multitude de peuple de toutes parts ; les uns baisoient ses pieds, autres, ne pouvans approcher de si près, y faisoient toucher leurs Chapelets, Heures ou Medailles, lesquels ils retenoient puis apres en grande reverence ; mais la pitié estoit de voir les pauvres veuves, orphelins,