qu’Alixandres donoit as demoisiaus de pris,
as fius as gentius hommes, de par tout le pais,
si que, par tout le mont, ert si montés ses pris
c’on ne quidoit qu’è l’ mont fust autreteus hom vis.
à xiii. ans et v[1] mois fu ses termes asis
que chevaliers dut estre, li congiés en est pris.
li baron vont au roi à raison l’en ont mis :
« d’une riens soies vus, sire, seurs et fis,
« que vos fius a le cuer de grante force espris ;
« quar tant conquerre cuide desor ses anemis,
« qu’au partir en sera li plus rices mendis ;
« et vus soies à aise, en repos soies mis
« et ales en rivière od vos faucons volis ;
« vos fius soit chevaliers et deviegne penis,
« si conquerre la tierre à tous ses anemis.
« Dex a fait peu de tiere, si com lui est avis,
« quar se il en estoit sires et poestis,
« toute l’aroit donée de si à xv. dis.
« icest plet comperront li mauves rice asis,
« qui les frans chevaliers ont fait povres mendis,
« et ont les grans tresors et les ciers pales bis[2]
« dont li regnes de Greses ert vestus et porpris. »
Entor le roi estoient li demaine et li per ;
d’Alixandre li prient, ne l’ face demorer,
car bien est de l’ eage que armes puist porter.
la roine de Grese en vet au roi parler ;
li rois ot la parole et le tierme noumer,
si dist à la roine : « or vus estuet pener
« de querre rices dras, por lor cors conraer ;
« et jou m’entremetrai de boins conrois doner,
« et ferai ccc. autres pour s’amour adouber. »
la roine en fu lie, si se vot fort pener,
quar c’ert la riens è l’ mont qu’ele doit plus amer,
à icest mot commence li baniers à crier,
por les valles bagner facent aighe aporter.
Alixandres l’oi, si a dit comme ber
F.6aque ja n’i aura aighe, fors le sause de mer.
Page:Lambert li Tors - Li romans d’Alixandre, 1846.djvu/41
Le texte de cette page a été corrigé et est conforme au fac-similé.
13
ENFANCE D’ALIXANDRE.
![](http://upload.wikimedia.org/wikipedia/commons/thumb/6/6e/Lambert_li_Tors_-_Li_romans_d%E2%80%99Alixandre%2C_1846.djvu/page41-1024px-Lambert_li_Tors_-_Li_romans_d%E2%80%99Alixandre%2C_1846.djvu.jpg)