les bons augureors a fait querre d’Espaigne,
devins et sages clers communalment amaine.
premiers i est venus Aristotes d’Ataine ;
quant furent asanlé, une cambre en fu plaine.
tout le songe lor conte, et cescuns d’aus se paine
de respondre le roi boine raison certaine.
Premiers parla un Grius qui cuidoit estre fors[1]
de maintes sapiences, et de sortisseours,
et de l’art d’ingremance, et des devineors.
por c’ot non Astarus, que il savoit les cours
des estoiles de l’ ciel et de l’ sens des auctors.
« or m’entendes, fait-il, des grans et des menors,
de vostre sonje espondre serai ore doutors.[2]
li oes est vaine cose, petite est sa vigours ;
li serpent qu’en iscoit, fel est, de males mours ;[3]
c’est i. hom orgillous qui mouvra mains estors,
et vorra sormonter rois et empereours,
et mettre desous lui et rois et aumacors,[4]
et conquerre par force les castiaus et les tors,
et prendre et retenir et tieres et ounors ;
mais ne le pora faire, petite est sa valors[5]
ains tornera arrière, petite est[6] sa vigors. »
quant Felipes l’oi, d’ire mua coulours,
et cuida qu’Alixandres venist à ites tours.[7]
Après cestui parlas Salios de Monmier ;[8]
sages hom de la loi, ases sot de l’ mestier :
« oies, fait-il, signor, que je vus voel noncier
de cose qui en songe pecoie de legier ;
ne croi-jou que nus hom peust bien esploitier.
li oes est vaine cose, legiers est a brisier ;
li serpens qu’en iscoit, k’il vit felon et fier,
est i. hom de fol cuer qu’il[9] volra guerroier,
et toutes les contrées guerpir et exillier ;
mais tout son desirier ne pora exploitier,
quar tout cil li fauront ki li voiront[10] aidier ;
Page:Lambert li Tors - Li romans d’Alixandre, 1846.djvu/34
Le texte de cette page a été corrigé et est conforme au fac-similé.
7
ENFANCE D’ALIXANDRE.
