Si ſes yeux ne lui deuoient eſtre rendus, que lui nuit le bandeau ? Que bien tu te montres ingrat à ce coup, fils de Venus, quand tu calomnies le bon vouloir que t’ay porté, & interpretes à mal ce que je t’ay fait pour bien. Pour agrauer le fait, on dit que c’eſtoit en lieu de franchiſe. Auſſi eſtoit ce en lieu de franchiſe, qu’Amour auoit aſſailli. Les autels & temples ne ſont inuentez à ce qu’il ſoit loiſible aus meſchans d’y tuer les bons, mais pour ſauuer les infortunez de la fureur du peuple, ou du courrous d’un Prince. Mais celui qui pollue la franchiſe, n’en doit il perdre le fruit ? S’il uſt bien ſuccedé à Amour, comme il vouloit, & uſt bleſſé cette Dame, je croy qu’il n’uſt pas voulu que lon lui euſt imputé ceci. Le ſemblable faut qu’il treuue bon en autrui. Folie m’a defendu que ne la fiſſe miſerable, que ne vous ſuppliaſſe pour lui pardonner, ſi faute y auoit : m’a defendu le plorer, n’embraſſer vos genous, vous adiurer par les gracieus yeus, que quelquefois auez trouuez agreables venans d’elle, ny amener ſes parens, enfans, amis, pour vous eſmouuoir à pitié. Elle vous demande ce que ne lui pouuez refuſer, qu’il ſoit dit, qu’Amour par ſa faute meſme eſt deuenu aueugle. Le ſecond point qu’Apolon ha touché, c’eſt qu’il veut eſtre faites defenſes à Folie de n’aprocher dorenauant Amour de cent pas à la ronde. Et ha fondé ſa raiſon ſur ce, qu’eſtant en honneur & reputacion entre les hommes, leur cauſant beaucoup de bien & plaiſirs, ſi Folie y eſtoit meſlee, tout tourneroit au contraire. Mon intencion ſera de montrer qu’en tout celà Folie n’eſt rien inferieure à Amour,
