ils estoyent, luy mect un bandeau, fait de tel artifice, qu’impossible est le luy oster. Venus se plaint de Folie. Jupiter veut entendre leur différent, en plaine assistance des Dieux. Apollo et Mercure debattent le droit de l’une et l’autre partie, Apollo celuy d’Amour, et Mercure de Folie. Jupiter les ayant longuement ouïs, et voyant les Dieux diversement affectionnez, et en contrariété d’opinions, les uns pour la Déesse Folie, les autres favorisans à Amour, pour appointer ce different, va prononcer cest arrest qui s’ensuit : Pour la difficulté et importance de vos differents, nous avons remys vostre affaire d’icy à trois fois sept fois neuf siecles, et ce pendant vous commandons vivre amiablement ensemble, sans vous outrager l’un l’autre. Et guidera Folie l’aveugle Amour, et le conduira par tout où bon luy semblera. Et sur la restitution de ses yeux, après en avoir parlé aux Parques, en sera ordonné. Ce dialogue outre ce qu’il est fort moral, et plein de traits de belle Philosophie, il est diversifié de plaisans evenemens, et succez qui adviennent aux amoureux, posez avec grande elegance, et beaux termes. Et ne s’est ceste Nymphe seulement faite cognoistre pas ses escrits, aincois par sa grande chasteté. L’autre dame estoit nommee Pernette du Guillet toute spirituelle, gentille, et treschaste, laquelle a vescu en grand renom de tout meslé sçavoir, et s’est illustree par doctes et eminentes poësies, pleines d’excellence de toutes graces. Elle trespassa de ce siecle en meilleure vie, l’an de salut mille cinq cens quarante cinq. Les Poëtes françois celebrerent ses obseques.
