Page:La Vie de saint Alexis.djvu/15

LXIX.	« Molt longement ai ot lui converset :
	De nule chose certes nel sai blasmer,
	E ço m’est vis que ço est li om Deu. »
	Toz sols s’en est Eufemiiens tornez,
	Vint a son fil ou gist soz son degret.
LXX.	Les dras sozlievet dont il esteit coverz :
	Vit del saint ome le vis cler e bel ;
	En son poing tient sa chartre li Deu sers,
	Ou at escrit trestot le suen convers :
	Eufemiiens vuelt saveir qued espelt.
LXXI.	Il la vuelt prendre, cil ne li vuelt guerpir.
	A l’apostolie revient toz esbadiz :
	« Ore ai trovet ço que tant avons quis :
	Soz mon degret gist uns morz pelerins ;
	Tient une chartre, mais ne li puis tolir. »
LXXII.	Li apostolies e li emperedor
	Vienent devant, gietent s’ad oreisons,
	Metent lor cors en granz afflictions :
	« Mercit, mercit, mercit, saintismes om !
	Net coneumes n’encor net conoissons.
LXXIII.	« Ci devant tei estont doi pechedor,
	Par la Deu grace vochiet emperedor ;
	Ço’st sa mercit qu’il nos consent l’onor.
	De tot cest mont somes nos jugedor :
	Del tuen conseil somes tot bosoignos.