Touchant les Cons hydropiques, les vns reſſemblent à vne groſſe boignette fenduë, les autres vn gros cœur de mouton my party par le bas, & de ceux cy le fruit eſt beaucoup plus plaiſant, & beaucoup voluptueux. Et pour tant vn grand Commiſſaire des guerres, en ſon temps grand perſcruteur des ſecrets muliebres, à la requeſte de Monſieur des Cordes, lors Gouuerneur de Picardie, fit deux elegantes Ballades, l’vne de la perfection & beauté d’vn cheual, & l’autre de l’excellence de ſa femme : & quand il viend à deſcrire la region de baſſe friſe, il dict que la belle femme doit eſtre.
Parmi les reins bien fournie en charnée
Groſſes cuiſſes, deuant haute en Connée,
Et en beauté parfaicte à l’aduenant,
De doux racueil, & de rebelle entrée,
Le ventre épois motte de frais raſée,
Le cropion tenir directement,
Et ſon bourdon ſerrer eſtroittement,
Ie ne m’enquiers de trop ou peu profonde.
Le compagnon porter ioyeuſement,
Parfaicte en biens ſeroit la plus du monde.
