Cette page a été validée par deux contributeurs.
4
FABLES CHOISIES.
Et qui naquiſtes toute belle,
A voſtre indifference prés,
Pourriez-vous eſtre favorable
Aux jeux innocens d’une Fable ?
Et voir ſans vous épouventer,
Un Lion qu’amour ſçeut dompter ?
Amour eſt un étrange maiſtre.
Heureux qui peut ne le connoiſtre
Que par recit, luy ny ſes coups !
Quand on en parle devant vous,
Si la verité vous offenſe,
La Fable au moins ſe peut ſouffrir.
Celle-cy prend bien l’aſſeurance
De venir à vos pieds s’offrir,
Par zele & par reconnoiſſance.
Du temps que les beſtes parloient
Les Lions entr’autres vouloient
Eſtre admis dans noſtre alliance.