Cette page a été validée par deux contributeurs.
Le Drappier.
Escus ? Voire, se peut-il faire
Que ceulx, dont vous devez retraire
Ceste rente, prinssent monnoye ?
Pathelin.
Et ouy dea, se je le vouloye ;
Tout m’en est ung en payement.
Quel drap est cecy ? Vrayement.
Tant plus le voy, et plus m’assotte.
Il m’en fault avoir une cotte,
Brief, et à ma femme de mesme.
Le Drappier.
Certes, drap est cher comme cresme !
Vous en aurez, se vous voulez :
Dix ou vingt francs y sont coulez
Si tost !
Pathelin.
Ne m’en chault, couste et vaille !
Encor’ ay-je denier et maille
Qu’oncq’ ne virent pere ne mere.
Le Drappier.
Dieu en soit loué ! Par sainct Pere,
Il ne m’en desplairoit empiece.
