Cette page a été validée par deux contributeurs.
Pathelin.
Il n’y a nul qui se cognoisse
Si hault en avocation.
Guillemette.
M’aist Dieu, mais en trompacion.
Au moins, en avez-vou le los.
Pathelin.
Si ont ceulx qui de camelos
Sont vestuz, et de camocas,
Qui dient qu’ilz sont avocas,
Mais pourtant ne le sont-ilz mie.
Laissons en paix cest baverie ;
Je m’en vueil aller à la foire.
Guillemette.
A la foire ?…
Pathelin.
Par saint Jehan ! voire :
A la foire, gentil’ marchande,
Vous desplaist-il, se je marchande
Du drap, ou quelque autre suffrage
Qui soit bon à nostre mesnage ?
Nous n’avons robe qui rien vaille.
