Cette page a été validée par deux contributeurs.
Pathelin.
S’en pourroit-il taire ?
Le Drappier, à Pathelin.
Et c’est à vous que j’ay affaire :
Vous m’avez trompé faulcement,
Et emporté furtivement
Mon drap, par vostre beau langaige.
Pathelin, au Juge.
Ho ! j’en appelle à mon couraige :
Et vous l’oyez bien, monseigneur.
Le Drappier.
M’aist Dieu ! vous estes le greigneur
Trompeur !…
Au Juge.
Monseigneur, quoy qu’on die…
Le Juge.
C’est une droicte conardie
Que de vous deux : ce n’est que noise.
Il se lève.
M’aist Dieu, je loe que je m’en voise.
Au Bergier.
Va-t’en, mon amy ; ne retourne
Jamais, pour sergent qui t’adjourne.
La Cour t’absout : entends-tu bien ?
