Cette page a été validée par deux contributeurs.
Il cuide parler à ses bestes. »
Mais, s’ilz devoient rompre leurs testes,
Que autre mot n’ysse de ta bouche :
Garde-t’en bien !
Le Bergier.
Le faict me touche.
Je m’en garderay vrayement,
Et le feray bien proprement,
Je vous promets et afferme.
Pathelin.
Or t’en garde ; tiens-toy bien ferme,
A moy-mesme, pour quelque chose
Que je te die, ne propose,
Si ne respondz point autrement.
Le Bergier.
Moy ! nenny, par mon sacrement !
Dictes hardiment que j’affolle,
Se je dy huy autre parolle,
Vous ne à autre personne,
Pour quelque mot que l’on me sonne,
Fors Bée, que vous m’avez apprins.
Pathelin.
Par sainct Jean ! ainsi sera prins
Ton adversaire par moe.
