Cette page a été validée par deux contributeurs.
Pathelin.
Prendray-je ung autre cristere ?
Le Drappier.
Et que sçay-je ! Qu’en ay-je à faire ?
Neuf francs m’y fault, ou six escus.
Pathelin.
Ces trois petis morceaulx becuz,
Les m’appellez-vous pilloueres ?
Ilz m’ont gasté les machoueres.
Pour Dieu ! ne m’en faites plus prendre,
Maistre Jehan : ilz m’ont fait tout rendre.
Ha ! il n’est chose plus amere !
Le Drappier.
Non ont, par l’ame de mon pere !
Mes neuf francs ne sont point rendus.
Guillemette.
Parmy le col soient-ilz pendus
Tels gens qui sont si empeschables !
Allez-vous-en, de par les dyables,
Puis que de par Dieu ne peult estre !
