El baro de la vila son s’aisi ben defes
Que dedins e defora an tans colps datz e pres
Dels brans e de las massas, dels talhans colonhes,
Que sancs e carns e glazis hi rema tant espes
Que pro i romas vianda als auzels e als ches.
Ara laichem lo seti qu’es mals e mortales
E parlem de[l] bon comte senhor de Savartes,
Ab lui Rotgers Br. el Lops de Foish, tuit tres,
E i es Br. Amelhs senher de Palhares,
W. Br. d’Asnava e n’Izarns Jordanes,
En Rotbertz de Tinhes ab lor de Carcasses,
Br. A. del Pueh e n’Aimerics que i es,
En W. de Niort, Jordas de Cabares,
Ab lo comte de Foish intran en Lauragues,
E prendon bous e vacas e vilas e pages
E venon a Vazeja e an los ostals pres.
Mas n’Folcaut de Merli ab lo sieu parentes,
Qu’es mals e pros e savis e fortz et entremes,
En Johans, en Tibautz, el vescoms Lautragues,
En Johans de Bulho, n’Amaldrics de Luces,
En Ebrart de Torletz, n’Albarics, en Jaques,
En Johans de Mozencs, en Johans Lomanhes,
Ab bonas armaduras e ab cors leones,
Cavalgan la batalha on lo coms de Foih es.
E cant lo jorns repaira el terminis ceres
Es ichitz de Toloza lo coms joves marques
Del linhatge de Fransa et del bo rei Engles,
Ez ac en sa companha motz baros Tolzanes :
N’Arnautz de Vilamur en Bertrans Jordanes,
E i es Guirautz Unautz, Rodrigos e n’Ugues,
— 8997. Rodrigros, ms. Lodrigos.
