« La merces e la vilas podo endevenir ;
« E si Glieiza s’orgolha lai on se deu blandir,
« La merces s’en rancura es penet d’obezir.
« E si no faitz la Glieiza ab Toloza avenir,
« Motz esperitz se perdo ques poirian noirir.
— Coms, » ditz lo cardenals, « als er al departir :
« C’abans nos laichariam debrizar e croischir
« Que de la mort del comte nols fassam penedir.
« Que, per la fe queus deg, una reus pos plevir :
« No valon tant per armas ni per guerra bastir
« Que nos a Pentecosta non aiam tal .I. tir
« Que no i aura archangel que non giet .I. sospir.
— Senhors, » so ditz lo coms, « cels ne lais Dieu gauzir
« Que mantenon dreitura, els autres penedir. »
La crotz es sopartida e torna en azir,
Que vengutz es lo termes del dar e del ferir,
Que Toloza s’enansa, que voldra retenir
Tot Pretz e tot Paratge que no poscan perir ;
Car lo valens coms joves quel mon fa reverdir,
E colora e daura so ques sol escurzir
S’en intra per las terras recebre e bandir,
E Condom e Marmanda e Clairac azaptir
Ez Agulho combatre e prendre e sazir,
E los Frances confondre [e] destruire e aucir,
En Br. de Cumenge s’a ops a enantir,
— 8763. vilas, ms. vila se. — 8766. no (correction de Fauriel), ms. uos. — 8769. Réd. en pr. que plus leu se laissarian escorgiar tots vieux (p. 105). — 8781. Réd. en pr. Adonc se son rendudas al comte jove Agulho et autras plassas, que deffunt lo C. de M. avia presas (p. 105). L’épisode du combat avec Joris, qui occupe la tirade CCIX, est résumé dans la réd. en pr. en cinq lignes.
