Qu’en las doas partidas fassal dreg esclarzir !
Car Montfort e Toloza tornan a escrimir,
Que per la mort del paires vol lo filhs afortir.
Ez a faitas las terras els baros somonir,
E tenc sa cort complida per son dreg devezir,
E parla e cosselha, e comensec a dir :
« Senhors, mortz es mos paire queus sol en car tenir,
« E car no posc lo seti de Toloza complir,
« Ajudatz me las terras defendre e mantenir.
— Coms, » ditz lo cardenals, « aujatz queus volh querir :
« Que fassatz vostras vilas els castels establir,
« E metetz hi tals gardas c’o sapchan ben tenir.
« E vos, senher n’avesques, anatz tost enquerir
« Lo senhor rei de Fransa que nons laish perterir,
« E a la kalenda maya, no i poscan pas falhir,
« Venga en esta terra la Glieiza essenhorir
« Ens fassa la corona e so filh amarvir,
« Am que puscam Toloza cofondre e destruzir
« Que nos a mort lo comte e nos dona cossir.
« Ez ieu trametrai letras e sagel per legir
« Al senhor apostoli, c’aras deu enantir
« Per la Glieiza defendre e per se enriquir ;
« C’ara es morta l’estela que solia luzir.
« E diirai de Toloza, per so que melhs l’azir,
« Que no la pot la Gleiza ni nulha res blandir.
« Tant es mala e salvatja e greus per convertir
« Que focs ni carns ni glazis no la pot conquerir.
« Ez el fassa las terras prezican somonir,
« Els prelatz de la Gleiza per las guerras formir,
« Los coratges essendre e las lenguas forbir,
« Ez ano per lo setgle los prezics espandir,
Page:La Chanson de la croisade contre les Albigeois, 1875, tome 1.djvu/364
Le texte de cette page a été corrigé et est conforme au fac-similé.
352
[1218]
croisade contre les albigeois.
