Los poders els coratges el talant enardic ;
E cascus en la plassa ab sas armas salhic,
E van ardre la gata, que res no la escantic.
Tota la noit el dia la vila s’esbaudic,
E lo setis defora sospirec e fremic.
E cant lo jorn s’esclaira e lo temps abelic,
Lo cardenals de Roma e l’autre baron ric
E l’avesques e l’abas que portal crucific
Cosselheron essems el paziment antic.
E lo cardenals parla si que cascus l’auzic :
« Senhors baro de Fransa, entendet[z] que vos dic :
« Gran mal e gran dampnatge, gran ira e gran destric
« Nos a fait esta vila el nostre enemic :
« Que per la mort del comte em en aital destric
« Per que perdem la forsa e lo gra e l’espic ;
« E fas m’en meravilhas cum Dieus lo cossentic,
« Car a la santa Glieiza et a nos nol giquic.
« E pos lo coms es mortz negus ara nos tric,
« E fassam ades comte de so filh n’Amaldric,
« Qu’el er pros hom e savis ez a bon cor e ric,
« E donem li la terra quel paire comqueric ;
« Ez ano per las terras li sermo el prezic ;
« E aissi moram essems car lo coms i moric.
« E trametrem e Fransa al bo rei nostr’amic
« Qu’a l’autr’an nos trameta lo sieu filh Lozoïc
« Per la vila destruire, que res no i edific.
— Senhors, » so ditz l’avesques, « re nous i contradic ;
« El senher apostolis que l’amec el legic
« Metra l’el consistori on sant Paul sebelic ;
« E fassal cors santisme, car la Glieiza obezic,
« Car el es sans e martirs, e d’aitant l’escondic
« Quez anc coms en est segle mens de lui non falhic ;
Page:La Chanson de la croisade contre les Albigeois, 1875, tome 1.djvu/356
Le texte de cette page a été corrigé et est conforme au fac-similé.
344
[1218]
croisade contre les albigeois.
