« Firetz, doussa mainada, membreus lo delivrers,
« Qu’oi issira Paratges del poder d’aversiers. »
Ez els li responderon : « Ben siretz vertadiers. »
E reprima la noiza e lo critz el chaplers
Dels borzes de la vila e dels capitolers.
En R. de las Bordas valens e fazendiers,
Bernatz de Sent Marti coitos e viacers,
W. P. de Montlaur combatens batalhiers,
En P. de la Illa suffrens e fazendiers,
En Br. de Cumenge arditz e prezentiers,
E i es W. Br. de Luzenac marviers,
En Gaudis, en Ferranz, coratgos e leugers,
Godafres e n’Arbois e n’Enrics Campaners
Els baros de la vila quels feron volunters.
En R. Yzarns crida : « Dem lor, als taverners !
« Cavaler, a las armas ! membreus lo castiers ! »
Dels brans e de las lansas e dels cairels grossiers
Recomensa la guerra el trebalhs el chapliers.
Pero ilh de la vila lor son tant sobrancers
Que dedins en las cledas foro contraengalers,
E firen lor abaton los cristals els ormers.
Mas aicels de lafora venc aitals desturbiers
Qu’ilh no podon suffrir los perilhs turmenters,
E laichen las gueridas ; mas desobrels destriers
Recomensal martiris ab aitals glaziers
Que pes e punhs e braces hi volan a cartiers,
E de sanc ab cervelas es vermelhs lo terriers.
E per l’aigas combaton sirvent e nautoniers.
E fora a Montoliu es lo chaples pleniers,
Qu’en Bartas esperona trol bocal dels porters.
— 8380. Ferranz, ms. Ferrandos. — 8396. Ms. aigals.
